Varikellaga (suvchechak) qarshi emlash nima?
Varikella vaktsinasi – bu bolalik davrida keng tarqalgan va juda yuqumli virusli kasallik bo'lgan suvchechakdan himoya qiluvchi vositadir.
Suvchechakka qarshi emlash jadvali
Suvchechakka qarshi emlash odatda 12 oydan 15 oygacha bo'lgan bolalarga birinchi marta beriladi. Himoyani mustahkamlash uchun 4 yoshdan 6 yoshgacha bo'lgan davrda kuchaytiruvchi (buster) doza qabul qilinadi.
6 yoshdan oshgan va ilgari suvchechak bilan kasallanmagan bolalarga 3 oylik interval bilan ikki doza vaktsina tavsiya etiladi. 13 yosh va undan katta bo'lgan, kasallikka qarshi emlanmagan o'smirlar esa ikki dozani 1-2 oylik interval bilan olishlari kerak.
Nega varikellaga qarshi emlash tavsiya etiladi?
Ushbu vaktsina deyarli barcha emlangan bolalarda kasallikning og'ir asoratlarini oldini oladi. Vaktsinaning engil shakllardagi kasallikka qarshi samaradorligi 85% gacha yetadi. Emlangan bolalarda kasallik juda yengil o'tadi.
Emlashdan keyingi nojo'ya ta'sirlar
Emlash joyida qizarish, noqulaylik, tana haroratining ko'tarilishi, charchoq kabi holatlar kuzatilishi mumkin. Ba'zi hollarda emlashdan so'ng bir oy ichida yengil toshmalar paydo bo'lishi mumkin, ular tez orada o'z-o'zidan yo'qoladi. Allergik reaktsiyalar xavfi juda past.
Vaktsinani qachon kechiktirish kerak?
Quyidagi holatlarda emlashdan avval shifokor bilan maslahatlashish zarur:
- Vaktsina tarkibiy qismlariga (jelatin, neomitsin) kuchli allergiya bo'lsa;
- Yaqinda qon quyish yoki gamma-globulin qabul qilingan bo'lsa;
- Immunitet tizimini zaiflashtiruvchi kasalliklar (masalan, saraton) mavjud bo'lsa;
- Steroid dorilar yoki kimyoterapiya qabul qilinayotgan bo'lsa.
Shuningdek, agar bola aspirin qabul qilsa, o'tgan oyda boshqa vaktsinalar olgan bo'lsa yoki trombotsitlar darajasi past bo'lsa, bu haqda shifokorni ogohlantiring. Homilador ayollar uchun ushbu emlash tavsiya etilmaydi.
Emlashdan keyingi parvarish
Emlashdan keyin og'riq yoki isitma kuzatilsa, shifokor tavsiyasiga ko'ra paratsetamol yoki ibuprofen kabi vositalardan foydalanish mumkin.
Qachon shifokorga murojaat qilish kerak?
Agar emlashni kechiktirish bo'yicha shubhalaringiz bo'lsa yoki emlashdan keyin kutilmagan salbiy reaktsiyalar yuzaga kelsa, zudlik bilan shifokoringiz bilan bog'laning.
Responses (0 )