Shamollash va allergiya: Qanday farqlash mumkin?
Agar sizda yilning ayrim fasllarida, masalan bahorda yoki yozda shamollashga moyillik bo‘lsa, bu qo‘rqinchli emas, lekin sizda allergiya bo‘lishi mumkin va buni e’tiborsiz qoldirmaslik kerak.
Xalq tilida “shamollash” deb ataladigan holat, aslida O‘TYUV (ORVI) — o‘tkir respirator virusli infeksiya bo‘lib, mavsumiy viruslar ta’sirida yuzaga keladi. Allergiya esa organizmning tashqi ta’sir etuvchi triggerlarga (allergenlarga) nisbatan o‘ta yuqori sezgirligidir. Ko‘p hollarda bu ikki holatning klinik belgilari o‘xshash bo‘lgani uchun ularni farqlash qiyin kechadi.
Shamollash va allergiya belgilari solishtirmasi
| Belgilari | Shamollash | Allergiya |
| Yo‘tal | Odatda | Goh-goh |
| Umumiy ahvol, xastalanishi va bo‘g‘imlarda og‘riq | Goh-goh | Hech qachon |
| Charchoq va holsizlanish | Goh-goh | Goh-goh |
| Ko‘z achishishi | Kam hollarda | Tez-tez |
| Aks urish | Tez-tez | Tez-tez |
| Tomoq og‘rig‘i | Tez-tez | Goh-goh |
| Burun oqishi | Tez-tez | Tez-tez |
| Burun bekish | Tez-tez | Tez-tez |
| Bezgak | Doim emas | Hech qachon |
Allergiya vaqtida qanday ehtiyot choralarini ko'rish kerak?
Agar sizda allergiya aniqlangan bo‘lsa, avvalo allergen bilan kontaktni chegaralang:
- Uyda va mashinada derazalarni berk tuting;
- Quruq shamol esayotganda ko‘chaga chiqmang;
- Oziq-ovqat ratsionida allergen mahsulotlarni cheklang;
- Ko‘chaga chiqqanda ko‘zoynak va burun uchun maxsus maska taqing;
- Ko‘chadan qaytgach kiyimni almashtiring, yuz-qo‘llaringizni yuving va dush qabul qiling.
Vrach retseptsiz dori-darmonlarni qabul qilish mumkinmi?
Chang allergiyasi yengil kechganda, burunni tuzli eritma bilan chayqash samarali hisoblanadi. Shuningdek, ikkinchi avlod antigistamin preparatlari (setirizin, loratadin, feksofenadin va b.) tavsiya etiladi. Birinchi avlod preparatlari esa uyquchanlik va holsizlik keltirib chiqarishi mumkin. Burun bekishida glyukokortikoidlar (flutikazon, mometazon) eng yaxshi vosita hisoblanadi, biroq ularni shifokor nazoratida qo‘llash tavsiya etiladi. Ko‘z qizarishi va yoshlanishida maxsus antigistamin tomchilardan foydalanish mumkin.
Qachon shifokorga murojaat qilish kerak?
Agar o‘z-o‘zini davolash choralari yordam bermasa, albatta allergolog shifokorga murojaat qiling. Mutaxassis to‘g‘ri tashxis qo‘yib, samarali davolash kursini belgilaydi. Allergiya mavsumi o‘tgach, allergen-spetsifik immunoterapiya (ASIT) orqali kasallikdan butunlay xalos bo‘lish imkoniyati mavjud.
Responses (0 )