“Yilning eng yaxshi tibbiy hamshirasi” koʻrik-tanlovi hamda “Kitobxonlik yarmarkasi” oʻtkazildi

Oʻzbekiston Respublikasi Ichki ishlar vazirining 2023-yil 11-apreldagi “IIOda “Vatanga va xalqqa sadoqat bilan xizmat qilish – oliy burchimiz!» shiori ostida “Maʼnaviyat oyligi”ni oʻtkazish toʻgʻrisida»gi 100-son Farmoyishi asosida hamda Ichki ishlar vazirining 2022-yil 29-avgustdagi “Ichki ishlar vazirligi tizimidagi davolash-profilaktika muassasalari tibbiyot xodimlari oʻrtasida “Yilning eng yaxshi tibbiy hamshirasi” koʻrik-tanlovini tashkil etish va oʻtkazish toʻgʻrisida»gi 340-son buyrugʻi talablari asosida joriy yil 12-may kuni vazirlik Davolash-profilaktika muassasalari Tibbiyot boshqarmasi Markaziy gospitalida “Yilning eng yaxshi tibbiy hamshirasi” koʻrik-tanlovining yakuniy bosqichi «12-may – Xalqaro hamshiralar kuni”da oʻtkazildi.

Koʻrik tanlovining yakuniy bosqichida gospitalning 2-nevrologiya boʻlinmasi muolaja xonasi tibbiy hamshirasi Xalmatova Maxfuza Jaxongir qizi, Fizioterapiya boʻlinmasi tibbiy hamshirasi Xodiyeva Shalola Sheraliyevna, Jarrohlik operatsiyalari boʻlinmasi bogʻlash xonasi tibbiy hamshirasi Aʼloxoʻjayeva Nazokatxon Ibroxim qizi, Ixtisoslashtirilgan jarrohlik boʻlinmasi tibbiy hamshirasi Narxodjayeva Mavluda Qoʻchqor qizilar ishtirok etishdi. Koʻrik tanlovning yakuniy bosqichi toʻrt shartdan iborat boʻlib birinchi shart — “Oʻzini va oʻzi ish faoliyat yuritayotgan boʻlinmasini tanishtirish”, ikkinchi shart — “Nazariy bilimlar sinovi”, uchinchi shart — “Amaliy bilimlar sinovi”, toʻrtinchi shart — “ijodiy shart, yaʼni erkin mavzu” talablari asosida oʻtdi.

Koʻrik tanlov yakunida Ixtisoslashtirilgan jarrohlik boʻlinmasi tibbiy hamshirasi Narxodjayeva Mavluda Qoʻchqor qizi yuqori ball toʻplab “Yilning eng yaxshi tibbiy hamshirasi” deb topildi. Qolgan ishtirokchilarga faxriy yorliq va qimmatbaho sovgʻalar berildi.

Bundan tashqari shu tadbir bilan birga “Maʼnaviyat oyligi” doirasida “Kitobxonlik yarmarkasi” ham tashkil etildi.